TUNATESHA IGHERI IBAHA PADA TUENDA MATEKWA TIKI, MTANO TUSINABHONA BHILA BYEDI BHIOHOHIRWA.

Bhatubheta bhala bheoho Tubheta, Shombeni na Masanga mto Mwabhushwaze na Mzuri Apa aisiswe amu ni wedi pada magheri mose.
Kiteto chetu cha yoo kifuma hena kitamo chakwe Mshenete Matayo:- 11:16-17.
Iki nibharinganishe na kini bhandu bha misii?
Bheikee sa bhana bheikesi kichinda. Mbotu mwezu ibhura bhengi (na ngori ya wanga)
“Tubhabhinie bhibhini bhya ngasu kake msijimie.
Tukabhabhinia bhibhini bhya bhifwa, kake msiie.
Itasi.
Apa Mzuri mlunga wanga na si tujughue meso na masikio metu ma ngoroni tunete kujima tukabhiniwa bhibhini bhya ngasu na kuia, tukabhiniwa bhya kifwa, hena izina lakwe Kristo Mkija wetu,
Esae.

Tukatungurusa icho Kiteto nezo ade tutonge nacho mtano mtambara wa 19 tubhona iti Yesu eokie ekibhura bhandu iti bhesina chedi.
Ebhabhurie iti Yohana ekimeze echungie esila kindu na esinyuie divai na kila mmwe akaghamba, “Ebhukwa na ehete mbepo.”
Mwana wakwe Mzuri (Yesu) naye akaza akala na akanywa na bhandu bhakaghamba,
“Eaka, ni mbuyaa wa bharechwa kodi na bhala bhesuike.”
Kiteto cheoho mwaji iti miikare ya bhandu bhesina chedi naukatebhahiria kini.
Mtano yoo, mbeho ikaza, (kisie)
“Uuwii!” Twawela. Zano ikaza (Sumesu) “Uuwii!!” Twaneta kuwela kukela.
Iki nicho Yesu eohoghamba iti tusina chedi uswi aha masangeni.
Mtano yoo ili, hena bhandu bhaketa fole ya Kuhira bhindu bhingi bhyedi bhya kughenja bhandu bha Mzuri amu bheghamba iti,
“Nikaketa hubho bhandu bheghambaze kana bhenitikiaze?”
Hira! Na usiituke mndu amu nete Yesu mwenye akija esikije bhandu hesina kindu echo ekihira.
Nete esikihoja bhawaji na kurusha (kufufua bhala bheokie bhefuie)
Magheri nikinabhina na Kwaya ya St. Luke’s, Mombasa, hamwe na mndwetu Blasto, tuitangwe Kwaya ya bhaengeji kake tusishighie kutonga kurebhina ha ma baa (bars) bhilabu (clubs) mtano ha hoteli ja bhatalii tutika kiteto cha Mzuri.
Tutongie Kenya mtano Tanzania na Uganda. Na hose eho tutongie tuuhiwe nezo pada na tukahira ndima ya Mzuri. Na Bishop etuisise (hamwe na kuitangwa bhaengeji)

Iki bhakundwa, hireni bhila bhyedi mkundie kuhiria kana kughenja bhandu. Bhashomba bheghambie iti,
“Tenda wema uende zako na Mola atakuridhia.”
Akacha ni bhurongori, rongorieni. Akacha ni kughenja, ghenjeni. Akacha ni kuchila kididi, chileni.
Ngea ni kini bhenebhahiria echo bhesimhirie Yesu? Yoko kung’angwa msalabeni. Kake ekimefwe akaruka bheshighiwe bheghamba,
“Kabhe uu mndu ne Mwana wa Mzuri, kididi.”
Tasiweni na Jumapili yedi ishenete sa mshamba wa ng’onji.
Mvono wakwe Jesu Kristo Mkija wetu,
Na lukundo lwakwe Mzuri Apa.
Na ulungano lwa Ngoro Mshenete,
Luoke hamwe na uswi bhose Iki na mtano ndarasi,
ESAE.